Speel met materiaal
Vanmelewe se outydse kantgordyne het gelukkig so te sê heeltemal uitgesterf. Vandag is daar 'n groot verskeidenheid deurskynende materiaal soos organza, voile of netstof wat die buitewêreld se oë sal uithou. Dié lap kan ook op sy eie gebruik word, of selfs bo-oor gordyne – dan bly dit hang as jy die gordyne wegbind.
Deursigtige gordyne
Dié braaivertrek kyk op die tuin uit en omdat privaatheid nie 'n behoefte is nie, is deursigtige gordyne gebruik. Vir 'n aardse voorkoms is daar op 100% linne besluit. Aangesien die vertrek kwaai middagson kry en linne maklik deur die son beskadig word, is UV-filters teen die vensters geplak. UV-filters is nie net 'n slim manier om gordyne te beskerm nie, maar bewaar ook vloere en meubels. Dié aanplakfilters is vandag in 'n verskeidenheid skakerings beskikbaar, en met die ligste een verloor jy net sowat 3% van die lig in die vertrek.
Stylvolle blindings
Dié verstelbare hortjies van Taylor Blinds is elegant en tydloos. Hortjies bied volle beheer oor lig, ventilasie en privaatheid en jy kan elke paneel individueel verstel.
Vir 'n seun
Moenie bang wees om gordyne in 'n seunskamer te gebruik nie. Dié stel met Orlando Pirates se embleem is net die ding vir 'n jong sokker-aanhanger.
Vensters en wat jy daarvoor hang , is 'n integrale deel van jou huis se dekor. Dit rond nie net 'n vertrek af nie, maar die styl, kleur en motief daarvan verklap ook iets van jou persoonlike styl.
