Dié maand

Wat is nou beter om 'n alleenaand mee op te kikker as 'n mooimaaksessie vir jou huis? Met die winter wat klop-klop aan die deur, en my liefiekind wat al vir meer as 'n maand in die buiteland kuier, is dit 'n gawe teenvoeter vir die gemis aan haar. Dis ook my kans om 'n bietjie nuwe lewe in my interieur te blaas wat nou al – vir dié wat my goed ken – te lank dieselfde deuntjie sing. Behalwe dat die regskuif van meubels terapeutiese waarde het, help dit ook om jou leefvertrek vars en nuut te hou. En dit is wat ons dié maand aanvang by Tuis; ons skep knus hoekies, kyk na kuns in die huis, kikker kamers op met verf en kook boontjies. So, moet nie net daar sit nie – begin skuif!
Anneke