Tuis Magazine

Bessie-mille-feuille

Genoeg vir: 8
Bereidingstyd: 40 minute
Oondtemperatuur: 220 °C
Baktyd: 30 minute

600 g skilferkorsdeeg

100 g haselneute, gerooster, fyngekap

45 ml suiker Bakkersvla

500 ml melk

30 ml botter

1 vanieljepeul, in die lengte oopgesny, saadjies uitgeskraap

4 eiergele

100 g strooisuiker

30 g mielieblom

knippie sout

250 ml room

250 g vars bessies

100 g strooisuiker
1 Voorverhit die oond. Voer 'n bakplaat met bakpapier uit. Rol die deeg op 'n meelbestrooide oppervlak uit tot 'n dikte van sowat 3 mm. Lig die deeg versigtig op en plaas dit op die bakpapier op die bakplaat. Bak vir sowat 10 minute teen 220 °C. Verlaag die oondtemperatuur en bak vir nog 10 minute teen 200 °C en daarna vir nog 10 minute teen 180 °C.
2 Meng die haselneute en suiker en sprinkel 'n bietjie daarvan oor die deeg sodra dit uit die oond kom.
3 Berei die bakkersvla Verhit die melk, botter en vanieljesaadjies tot kookpunt. Verwyder van die hitte en laat eenkant staan om te trek.
4 Klits die eiergele, strooisuiker, mielieblom en sout saam. Voeg die warm melk stadig by die eiermengsel terwyl jy dit aanhoudend klits. Giet alles weer terug in die kastrol en verhit dit oor lae hitte terwyl jy dit aanhoudend klits totdat dit die agterkant van 'n metaallepel bedek. Dit sal dikker wees, maar mag nie kook nie. Verwyder van die hitte en laat afkoel. Klits die mengsel elke nou en dan om te voorkom dat 'n vel bo-op vorm. Dit moet tot kamertemperatuur afkoel.
5 Klits die room styf sodra die vla afgekoel is. Vou die geklitste room in die vla en sit dit in die yskas tot nodig.
6 Rol die bessievrugte in die strooisuiker. Sny die skilferkorsdeeg in reghoekige vorms. Stapel die deeg, suiker-en-haselneutmengsel, bakkersvla en bessies bo-op mekaar en eindig met 'n laag skilferkorsdeeg. Sif laastens 'n bietjie versiersuiker oor en sit voor.

Lagie vir lagie goue geur