Ontsluier die betowering
Marokko is 'n magiese, mistieke land ryk aan Afro-Spaanse
stylinvloede wat weerspieël word in 'n eklektiese mengsel van
mitiese en godsdienstige elemente en helder kleure. Elke asemrowende
gebou is 'n argitektoniese wonder wat drup van die sjarme en mistiek
van ou, vergete tye.
Meubels met ingewikkelde handkerfwerk, en keramiekware ryklik
versier met sterk geometriese ontwerpe in 'n rits helder kleure, is
kenmerkend van die streek en sy mense.
Marokkaanse dekor is sensueel en romanties, met ryk teksture,
kleure en patrone wat tydlose skoonheid in sy aardse etnisiteit verseker.
Kry die voorkoms
1 Agter die gordyne
Drapeersels voor deure, ingange,
vensters en oor beddens is tipiese
elemente wat suiwer sagtheid en
sensualiteit aan 'n ruimte gee.
Gebruik deurskynende stowwe
in helder kleure wat liggies in
'n briesie roer en net genoeg
lig deurlaat om vir misterieuse
betowering te sorg.
2 Teen die mure
Muurkleure kry hul inspirasie
hoofsaaklik uit die woestynlandskap.
Hoewel lewendig, is
die kleure effens gedemp, wat
vir 'n harmonieuse vloei van
binne na buite sorg.
Tadelakt is 'n waterdigte kalkpleister
wat met mineraalpigment gekleur
word, met 'n rivierklip gepoleer en
daarna met olyfolieseep gladgemaak
word. Dis tradisioneel op binneen
buitemure en -oppervlakke
aangewend, en kan gebruik word
om mure, plafonne, vloere, wasbakke,
storte en baddens soomloos af te rond.
3 Eklektiese kuns
Kunswerke kom dikwels voor in
die vorm van unieke elemente
soos funksionele items, geverfde
teëls en heilige simbole. Sommige
aspekte van die Marokkaanse
styl kan amper as ongekunsteld
beskryf word – kyk byvoorbeeld na
die ou geroeste wasters wat hier
as tekstuurryke agtergrond vir die
versierde kruis gebruik is.
4 Dis in die detail
Jy word dikwels verras met treffende
detail: 'n weelderige tossel aan 'n
deurslot verplaas jou dadelik na 'n
ander wêreld.
5 Natuurlik in konteks
'n Mengsel van natuurlike materiaal
soos leerpoewe, wolkelim-kussings
en hout werk altyd goed saam,
en die fyn versiering van elke
getekstureerde item verleen 'n
unieke bekoring aan dié styl.
6 Aardse tradisie
'n Berbermat kan enigeen van 'n
verskeidenheid matte wees wat
in styl en voorkoms herinner aan
dié wat die Berbers van Noord-
Afrika tradisioneel, selfs so lank
terug as die paleolitiese tydperk,
van handgespinde, natuurlike
vesel geweef het. Dié inwoners van
Noord-Afrika (die Europeërs het
hulle gedurende die Middeleeue
More genoem) het wes van die Nylvallei
gewoon. Vandag woon sowat
14 tot 25 miljoen Berbers steeds in
die streek, die meeste in Marokko.
Het jy geweet?
Wol was eeue lank die enigste vesel
wat Berbers vir hul matte gebruik
het. Al kleure wat beskikbaar was,
was ligte natuurlike en neutrale
skakerings, anders as die donkerder
kleure wat ons daarmee vereenselwig.
Deesdae kry jy Berbermatte van nylonen
olefienvesels, maar steeds met 'n
pluispool en gewoonlik met donker
vlekkies oor 'n ligte agtergrond.
