Dink voor jy doen

Oorweeg hierdie punte sorgvuldig voor jy begin mure afbreek:

1 Kyk krities na jou huis en maak 'n prioriteitslys.
2 Doen jou huiswerk: bepaal wat jou huis se sterk punte is en konsentreer daarop. Oorweeg watter areas vergroot en verbeter kan word – dit help byvoorbeeld nie jy sit 'n nuwe kombuis in as jou dak lek of die fondasie gekraak is nie.
3 Doen 'n bietjie marknavorsing. Teen watter prys word soortgelyke huise in jou omgewing verkoop? As jy oor 'n paar maande wil verkoop, is dit belangrik om nie te oorkapitaliseer nie. Gesels met plaaslike eiendomsagente om 'n duidelike markwaarde te bekom, sodat jy jou verbeterings na verhouding kan beplan.
4 Jy hoef nie altyd groter te maak of vertrekke aan te bou om waarde tot jou huis toe te voeg nie; deur binnemure uit te breek kan jy ook die ruimte geriefliker en dus waardevoller maak.
5 'n Nuwe laag verf bly die mees ekonomiese manier om jou huis op te vrolik en nuut te maak, veral as jou begroting knap is. Dit lewer ook die beste opbrengs op jou belegging.