Alleenloper
Min dinge is meer opwindend as om jou eerste blyplek
te koop. As jy boonop 'n alleenloper is, het jy 'n unieke
voordeel: jy kan jou nuwe plek heeltemal na jou eie smaak
en behoeftes inrig, sonder om enigiemand in ag te neem.
Karakters soos Alfie, Bridget Jones en die meisies van
Sex and the City het immers vir ons gewys hoeveel pret
alleenlopers kan hê.
Maar eers is daar die Groot Soektog: nie net vir die regte
blyplek nie, maar veral vir een wat jou sak pas én 'n goeie
belegging sal wees.
Wanneer moet jy koop?
Dié vraag is nie maklik om te beantwoord nie. As jy nie 'n
los miljoen of twee in kontant of 'n vet trustfonds het nie,
gaan daar nie 'n "makliker" kooptyd aanbreek nie. Die kort
antwoord is dus: hoe gouer, hoe beter.
'n Eie blyplek verhoog jou lewensgehalte, want niemand
kan skielik die reëls verander, jou kontrak beëindig of op 'n
Sondagmiddag kom skouhuis hou wanneer jy net in vrede
met 'n boek wou uitspan nie. Boonop sien jy nooit weer die
geld wat jy aan huur bestee nie, want in werklikheid betaal
jy iemand anders se verband af.
En hoe langer jy die kopery nou uitstel, hoe duurder
(en moeiliker) gaan dit word, want ongelukkig styg eiendomspryse
en salarisse nie teen dieselfde koers nie
Waar moet jy koop?
Eiendomskenners sê altyd 'n mens moet die kleinste of onaantreklikste blyplek in die beste buurt koop. As
jy 'n alleenloper is, is goeie sekuriteit byvoorbeeld belangriker as goeie
skole. Kies 'n buurt met mense van jou ouderdomsgroep en lewenstyl:
as jy 'n partytjiedier is, gaan jy nie tuis voel in 'n plek waar al die huise
saans na negeuur donker is nie. Neem ook die verkeer werk toe in ag.
Sakpas-dekorwenke
vir alleenlopers
Die woonstel op ons foto's is die perfekte
alleenloper-plek: dis kompak (sowat 45 m2),
en danksy die elegante tweedehandse retromeubels
word styl en gerief nie afgeskeep nie.
Struktureel
Die eienaar het 'n paar slim strukturele
veranderings aangebring om dié kompakte
blyplek te vergroot:
Mure is uitgebreek om die leefruimte te
vergroot en die balkon is daarby ingesluit.
Daar is geen binnedeure nie, behalwe by die
badkamer. Skuifdeure is ook 'n oplossing in 'n
klein ruimte, want standaard-binnedeure neem
heelwat ruimte in beslag.
Vloere en muurafwerking
Die mure is oral in dieselfde ligte kleur geverf en
die oorspronklike parketvloere is afgeskuur en
mooi vernis.
As jy ou parketvloere opknap, kan jy ekstra
houtblokkies tweedehands aanskaf. Soek by
handelaars in tweedehandse boumateriaal,
sloopwerwe en in jou koerant se snuffelbladsye.
Plaas die nuwe blokkies plek-plek tussen die
ou blokkies sodat jou vloer nie gelap lyk nie.
Jy kan ook die hele vloer donker beits om 'n
eenvormige voorkoms te kry.
Meubels
As jou begroting knap is, kan jy jou rande rek
met 'n retro-styl en tweedehandse meubels,
soos op ons foto's. Dit verg egter 'n bietjie moeite
om so 'n stylvolle voorkoms tweedehands te kry:
Wees op die uitkyk vir stukke met klassieke
lyne en 'n goeie, stewige struktuur.
Moenie dat geskeurde of vuil stoffeerwerk jou
afskrik nie. Dit kan oor gedoen word, soos die
wit vinielstoffeerwerk op ons foto's.
Hou by 'n eenvormige styl of era. Die retromeubels
op ons foto's kom hoofsaaklik uit
die jare sestig en sewentig. Dit kan met nuwe
bykomstighede opgedateer word.
Wanneer dit by tafels en koffietafels kom,
is die pote baie belangrik omdat dit heelwat
omtrent die styl verklap. Die blad kan maklik
met nuwe glas of hout vervang word indien die
oorspronklike dalk erg beskadig is.
Bykomstighede
Vase, oorgooidekens en strooikussings in die
nuutste modekleure gee tweedehandse meubels
'n vars, kontemporêre voorkoms. Klop aan by
bekostigbare winkels soos @home, Ackermans
Home Comforts, Clicks en Mr Price Home.
As een 2 word...
Wanneer rentekoerse styg, moet
mense wat die eerste keer 'n huis
koop gewoonlik 'n kleiner plek
aanskaf. En wanneer jy later die
liefde van jou lewe ontmoet, is dié
blyplek dikwels net te beknop vir
twee mense.
'n Huishouding waarin albei
mense werk, kan gewoonlik wel 'n
groter eiendom bekostig. En as jy
nie eiendom in jou alleenloperdae
gekoop het nie, is dit dalk nou binne
jou bereik.
Dit help baie as jou papierwerk
reeds agtermekaar is wanneer jy
die dag die perfekte blyplek kry. Ou
Mutual Bank gee dié wenke:
Maak seker jou kredietrekord
is in orde: Skuld gaan eenvoudig
nie vanself weg nie. Betaal al jou
rekeninge betyds sodat jy 'n skoon
kredietrekord opbou.
Doen jou somme: Stel 'n staat op
van jou inkomste en uitgawes sodat
jy weet wat die huispaaiement is
wat jy kan bekostig. Die banke laat
gewoonlik 'n paaiement van 30%
van jou bruto inkomste toe.
Kry 'n vooraf goedgekeurde
leningsertifikaat: Tydens dié
proses doen jy reeds voordat jy
wil koop by 'n bank aansoek om
'n lening. As alles goed gaan, kry
jy dan 'n skriftelike bewys van die
lening waarvoor jy kwalifiseer.
Wees realisties: Dis nie altyd 'n
goeie idee om die grootste lening
waarvoor jy kwalifiseer uit te neem
nie. Saam met huiseienaarskap
kom daar ander uitgawes, soos
versekering, munisipale rekeninge,
onderhoud en herstelwerk.
Beplan vir die onverwagse:
Daar kan iets onvoorsiens gebeur
nes jy jou laaste sente vir jou
nuwe blyplek se oordragkoste
bymekaargeskraap het: 'n stukkende
geiser of diefalarm. Dis 'n
goeie idee om 'n noodfonds vir
sulke gebeurtenisse te hê.
Kyk voor jy koop
Die meeste mense is maar
platsak nadat hulle eiendom
gekoop het. 'n Huis met baie
werk laat dalk jou selfdoenvingers
jeuk, maar kan ook jou
begroting verwoes. 'n Huis hoef
natuurlik nie perfek te wees
wanneer jy dit koop nie; jy
moet net seker wees jy kan dit
bekostig en weet waarvoor jy
jou (geldelik) inlaat.
Nedbank raai kopers aan om
na die volgende op te let:
veiligheidshekke,
alarm en diefwering
vloerafwerking
verfwerk
lekplekke en krake
plafon
fondamente
rioolstelsel
elektrisiteit
(veral in ou huise)
vensterrame en deure
plaveisel
houtwerk
swembad
loodgieterwerk
tekens van vogprobleme
Sakpas-dekorwenke
as een 2 word
Die oopplan-uitleg van die huis op ons
foto's is perfek vir mense sonder kinders:
daar is net een slaapkamer wat beteken die
leefvertrek is ekstra groot, en ideaal vir 'n
moderne, minimalistiese styl.
Struktureel
Al die mure is nie tot teenaan die plafon
gebou nie. Dit sorg vir die maksimum
natuurlike lig en bespaar boukoste.
Die enkele binnemure is droëmure van
Rhinowall, en al die elektriese bedrading en
loodgieterwerk is in dié mure. Dit is maklik
om te installeer (die Gypsum Academy kan
jou tydens 'n eendagkursus leer), en dis 'n
vinnige boumetode wat arbeidkoste bespaar.
Droëmure is nuttig wanneer mense se
behoeftes verander. Een groot vertrek kan
byvoorbeeld in twee verdeel word, sonder
ontwrigtende, stowwerige bouwerk.
Die oop dakbalke skep 'n gevoel van
ruimte. Die IsoBoard-plafonne is 'n kostedoeltreffende
keuse: dit bied goeie isolasie
en 'n esteties bevredigende afwerking.
Vloere en muurafwerking
Afgewitte dennehout is vir die vloere gebruik.
Houtvloere is 'n duursame, tydlose
keuse, en as jy moeg word daarvoor, kan
jy die voorkoms met 'n verskeidenheid
beitsprodukte soos dié van Genkem, Woodoc
of Plascon verander. Earthcote Limestone
verskaf 'n getekstureerde muurvoorkoms.
Meubels en bykomstighede
Wanneer twee alleenlopers se besittings
saamgegooi moet word, kan dit 'n deurmekaarspul
afgee – om nie te praat van
huismoles nie. Beplan dus jul nuwe blyplek
saam sodat albei tuis voel.
'n Mens hoef nie dadelik oral meubels te
hê as jy in 'n groter plek intrek nie. Kies 'n
paar goeie, basiese meubelstukke om mee
te begin; die res kan later kom – as dit nodig
is. In 'n oopplan-blyplek is minder regtig
meer: meer beweegruimte, meer opsies met
meubelplasing, meer lig.
Jy kan jou rande rek selfs as jou styl
modern is. Die houttoonbank in die badkamer
en die oorgetrekte sponsmatras wat
in die slaapkamer as kopstuk dien, is goeie
voorbeelde. 'n Verskeidenheid bekostigbare
opsies vir vensters is by winkels soos
Mr Price Home en Decorland (in Gamewinkels)
te kry.
As twee 4 word...
Wenke vir
Huissoekers
Wanneer 'n mens nie meer 'n
alleenloper is nie, verander behoeftes
dikwels. Miskien droom een van julle
daarvan om 'n eie sake-onderneming
by die huis te begin, of dalk wil julle
nog kinders hê. Hoe dit ook al sy, dink
na oor jul behoeftes – in die hede en
die toekoms – voordat julle koop.
Nedbank gee dié wenke vir diegene
wat huis soek:
Gerief: Kyk hoe ver julle sal moet ry
na skole, winkels, dokters, ens.
Blootstelling: Stel vas wat die
geraasvlakke (vliegtuie, bure en
verkeer) is, of daar lugbesoedeling
is, of die buurt dalk deur sterk
wind geteister word, en of daar
ondergrondse water is.
Toestand van die buurt: Lyk die
strate en die ander eiendomme
darem netjies?
Veiligheid: Vra uit oor die voorkoms
van misdaad.
Ontwikkeling: Stel vas of skole,
winkelsentrums, sokkerstadions of
groot padbou beplan word.
Sakpas-dekorwenke
as twee 4 word
Wanneer 'n gesin groei, groei almal se
behoefte aan ruimte terselfdertyd. 'n Groter
blyplek beteken natuurlik groter uitgawes,
en daarmee saam kom die uitdaging om jul
nuwe huis met 'n sakpas-begroting so mooi
moontlik te maak.
Struktureel
In 'n ou huis soos die een op ons foto's is
dikwels heelwat strukturele werk nodig om
'n gesinsvriendelike leefruimte te skep.
Mure is uitgebreek sodat 'n oopplanleefvertrek
ingerig kan word, en 'n nuwe
kombuis is aangebou.
As jy 'n ouer huis oorweeg, hou altyd
in gedagte dat dit 'n heeltemal ander gevoel
sal kry indien jy mure uitbreek: die
vertrekke sal dadelik soveel ligter, groter en
geselliger wees. Wees ook op die uitkyk vir
oorspronklike argitektoniese detail, soos 'n
werklike mooi kaggel.
Vloere en muurafwerking
Die oorspronklike houtvloere is herstel, en
die aangeboude kombuis kry teëlvloere
– 'n kindervriendelike, bekostigbare keuse.
Volvloermatte is steeds die bekostigbaarste
vloerbedekking en is besonder kindervriendelik:
oorweeg dit as jou nuwe blyplek
nie mooi houtvloere het nie. Die nuwe
reekse kan maklik skoongemaak word en
daar is ook verskeie vlekbestande opsies.
Die mure is afgewerk met BPB Gypsum
se Cretestone – dit kan gebruik word om
onegalige pleisterwerk of 'n outydse stippelafwerking
weg te steek. Dit kan geverf of
ongeverf gelaat word.
Meubels
Die huis op ons foto's het 'n eenvormige,
individualistiese styl wat tog
kindervriendelik is.
As jy meubels tweedehands koop, is
soliede hout 'n goeie keuse: jy kan heelwat
doen met 'n bietjie skuurwerk en vernis,
om nie te praat van toorkunsies met die
verfkwas nie!
Wees geduldig, want dit kan jare duur
en heelwat versamelwerk verg om 'n
styl soos op ons foto's te bewerkstellig.
Bykomstighede
Verweerde portretrame, optelgoed soos
dryfhout en rivierklippies en allerlei vondse
soos waaiers en erdewerk is ideaal vir 'n
"shabby chic"-styl. 'n Moderne glasvaas
hier en daar helder dié styl op.
Kliek hier vir ons galery.
