Laat jou onderklere jou inspireer.
Dra 'n wit korset onder 'n kort baadjie of oopgeknoopte bloes.
Die wit korset (R55) is van Glitterati en die baadjie met borduurdetail (R650) van Slate.
Rompstyle is korter dié somer – dit word net onder die knie gedra soos hierdie een (R1 399) van Habits. Dra voetlose kouse van kant (R385) van Slate onder jou romp met plat seilskoene (R229) van Zoom.

Meng teksture en gee wit nuwe somerwoema.
Dra op warm dae 'n kantbroek (R699) van broderie anglaise (geborduurde patrone met klein gaatjies) van Nicci Boutique saam met 'n kanttop (R255) van Slate en onder dit 'n gehekelde bikini-top.

Groot modenuus is wit skoene nadat dit lank 'n mode-taboe was.
Dié sexy sandale (R310) van Sissy Boy deur Cosmo Footwear sal jou voorkoms afrond.

Dra dié somer 'n paar voetlose kouse onder 'n romp of rok.
Dié paar (R395) is van Slate, die romp (R299) van Slick en die gehekelde top met p?ldetail (R699) van Nicci Boutique. Die wit hout-platformsandale met knoppiesdetail (R315) is van me too Cosmo Footwear.

Kantagtige breidrag is weer oral te sien – selfs in die warm maande.
Dié top (R350) is van Queenspark. Dra dit by 'n lang wit katoenromp (R299), ook van Queenspark.

Langbroeke met nou pype is in die kol saam met sagte frille en valle.
Dié wit noupyp-langbroek (R220) is van Foschini, die kantvalle-top (R250) van Slick en die kortmouhemp (R99,95) van Edgars.