Dankie tog vir die kaftan dié somer - dis koel, gemaklik en baie vleiend. Dié een (R180) is van Exact. Vir 'n elegante voorkoms - én om jou gesig teen die somerson te beskerm - dra 'n wit breërandhoed (R300) van Glare. Die pêrelhangertjie (R1 200) is van Sandy McCormack en die armband (R75) van Lulu Belle.

As jy selfbewus in jou swemklere voel, dra 'n sensuele kaftanstyl-top daaroor soos dié een (R1 499) van Habits. Die geel monokini (R326) is van JBS.

Wit is altyd 'n wenner in die somerhitte. So ook linne. Kyk hoe sjiek en koel lyk dié linnehemp (R680) van Philosophy en kortbroek (R499) van Habits. Die bikini-top wat onder die hemp uitloer, is van JBS (R385) en die bekoorlike krale – almal wat dit sien, wil dit hê! – van Lulu Belle (R150 elk). Die sonbril (R1 881) is van Ottica Venetta en beskikbaar by Glare. Die hoed (R90) is van Old Khaki en die lekker groot sak (R550) van Guess.

Die stylvolle rok (R890) is vleiend en boonop koel dis van Philosophy. (Lees meer op bl. 90 oor nuus van dié ontwerpersreeks van Jenni Button.) Die verleidelike brons skoene (R550) is van Nine West en die armbande (R55 elk) van Lulu Belle.

Sjiek kortbroeke is die volgende twee somers groot nuus – dié een (R515) is van Sinéquanone. Rond jou voorkoms af met 'n ligte driekwartmou-trui (R199) van Truworths oor jou swembroek as dit bietjie koeler raak. Die swemboek (R300) is van Miss Moneypenny by India Jane en die stringe oranje krale (lang string R590, kort string R185) van Zeca.

Armband (R90) van Big Blue, oranje armbande (R79 elk) van Accessorize en geel krale (R195 elk) van Purr.

Met die veelsydige kaftan-top (R750) van Sinéquanone kan jy strand toe gaan én uitgaan. Veral as jy dié string krale (R699) van Armilla daarby dra.

Jy hoef nie plakkies te dra om koel te wees nie – met dié skoene (R950) van Paradoxo gaan jy sjiek en sexy lyk en koel voel.