Hierdie is ‘n baie belangrike vraag en een wat sy kop van tyd tot tyd uitsteek – en ek is seker dat dat verskeie lesers van die Women24 Careers-webblad hierin sal belangstel weens die feit dat die hele kwessie van tydelike kontrakte tans soveel media-aandag trek. Daar is ook heelwat inligting wat behulpsaam sou gewees het om hierdie antwoord meer breedvoerig te maak, maar hier is vir eers ‘n brokkie of twee.

Die antwoord op hierdie vraag lê eintlik in die bewoording van die kontrak wat jy en die werkgewer onderteken het. Ek is seker dat êrens in die kontrak sê dit iets oor die feit dat daar geen verwagtinge oor die werknemer/werkgewer verhouding aan die kant van beide partye geskep word nie. Daar is ook heel moontlik (en hopelik) ‘n paragraaf wat die proses uitstippel wat gevolg moet word om vir jou te laat weet dat die kontrak hernu or nie hernu sal word nie.

Ek wil dus voorstel dat jy met jou bestuurder of die menslike hulpbron departement gesels en uitsluitsel verkry rondom jou posisie. Die ideale situasie sou wees dat jou kontrakperiode langer as net een maand op ‘n slag is en ook dat hulle jou vroegtydig laat weet wat die situasie in die volgende periode gaan wees. Dit sal jou dan geleentheid gee om verdere planne te maak.

Soos jy van my antwoord sal agterkom is daar verskeie aspekte waarna gekyk moet word – stuur nog ‘n vraag na die webblad indien ek jou van enige verdere inligting of advies kan voorsien..